-->
U3F1ZWV6ZTQ5ODM4NTA3NDYyX0FjdGl2YXRpb241NjQ2MDE1MjU5ODg=
recent
أخبار ساخنة

نصائح و إرشادات ضرورية للأساتذة الجدد 2020

 

نصائح و إرشادات ضرورية الأساتذة الجدد 2020

 

 نصائح و إرشادات ضرورية الأساتذة الجدد 2020

عزيزي الأستاذ عزيزتي الأستاذة، اغلبيتكم تعينوا هاد السنة بالعالم القروي او بمناطق شبح حضرية، و عليه باش دوز العام ديالك بألف خير و ينتهي بسلام، مجموعة من الأمور خاص تاخذها بعين الاعتبار :

  • 1.لا داعي نهار توقيع المحضر تجرجر معاك والديك راك كبرتي بما فيه الكفاية.
  • 2.نهار التنقل لمقر العمل و البعض منكم كايمشيو كمجموعات و كايستاقلو وسائل نقل عمومية ما فيه باس الواحد اطلع النيفو و انقص من التكركير و الهضرة الخاوية حيث الناس كاتخذ انطباعات من اللقاء الأول.
  • 3. الا كنت مولف واحد النوع ديال اللباس شورط القميجة محلولة و الصدر كا يبان ما فيها باس تعيد التظر فذاك اللباس و انت فالدوار باش ماتغلطش فيك واحد الفئة لا تفرق بين ذكر او انثى، و نفس الشيء بالنسبة للاستاذات حماية لك من بعض أصناف البشر لي ممكن اجيو لدقوعليك بالليل.
  • 4. الأطفال راهم امانة فرقبتك ماتعملش معاهم على أساس انك داير فيهم خير كادير واجبك فقط و كاتخلص عليه هما سبب وجودك فهاد المهنة.
  • 5.الا تلاقيتي مؤسسة بها اغراس او رسومات راه ماشي الوزير لزرعو فقط أساتذة سابقين ضحاو بفلسهم و قتهم من اجل خلق فضاء يصلح للتعلم الا مقديتيش تزيد عليه شي حاجة ما تكونش سبب حتى اخربوه الدراري قدام عينيك و انت ساكت تحت شعار داكشي ماشي خدمتي.
  • 6.الفرعيات لكاتكون من 4 او 6 أساتذة بنظام التفويح كايخلق مشاكل كثيرة بين الأساتذة باش تفاداها لازم :
  • أ.نظافة المؤسسة مسؤولية الجميع ماشي واحد اجمع الزبل و احرقو و انت وتلامذك تجيز الغذ ليه  تخويوه فينما كان و هادي بلاد الشرقي خويه مع 10 ارجع ليك مع الواحدة
  • ب.قاعة الدرس المشتركة ماشي ملك ليك بوحدك باغي دير ملصقات استشار مع زميلك و اتفقو على شي صيغة ترضيكم بزوج ماشي بين عشية و ضحاها القاك طلي الدنيا بحال الا هو معندو وجود كن على يقين غاتخلق عدو من فراغ، و نظافة القسم اتفقو عليها ماشي واحد اشطب واحد ازبل
  • ت. كل أستاذ اتوفر على الوسائل ديالو ما تكونش تقيل على القلب كل نهار كادور على الأقسام على مسطرة و بركار و طباشير
  • ج. الاستراحة حق مشروع للتلميذ ماشي من حقك تبقى شادو فيها باش اكمل الكتابة او أي نشاط و غادي تخلق مشاكل مع زميلك حيث غاتشد ليه تلامذ و دخل ليه فالتوقيت ديالو زيد عليها تبرزيط التلامذ بالمرحاض و الاكل وسط الحصة حيث حرمتيه انت من حقو فالاستراحة
  • ه. الا كنتي من أصحاب لانافيط وديما معطل و خارج قبل الوقت راك كتأذي زملاءك بطريقة غير مباشرة واحد خذام و داخل فالوقت و انت تلامذك رافعين التيفو وسط الساحة و خارجها.
  • 7. الا كنتي من ناس الدكة و الفطور وقت الاستراحة لا داعي تكلف التلامذ اغسلو الماعن فالمطعم و اعمرو ليك اتاي و اسلقو ليم البيض واش ترضى لولادك هادشي.
  • 8. كل أستاذ مطالب بالحراسة مرة اومرتين فالاسبوع حسب جدول الحراسة لكاتوقع عليه فبداية السنة و عليه فأنت المسؤول على أي حاجة كاطرى للتلامذ نهار الحراسة ديالك و للأسف كايوقعو حوادث مدرسية مميتة فهاد التوقيت بالضبط.
  • 9. مقر العمل ماشي ساحة للنضال او تبادل نظرات الاعجاب و ماتعتقدوش انكم كاتعاملو مع خناشي ديال التبن الأطفال يعرفون جيدا اش كايوقع فالمؤسسة و كايعاودوها بالتفصيل الممل و ازيد من راسو و ماتنساوش كاينة فئة فالدواور كاترصد الصغيرة و الكبيرة لغاية في نفس يعقوب.
  • 10. الا كنتي من مستهلكي منتوجات كتامة او سيدنا الزنبير الله ارحمو لا داعي اعرفها عليك القاصي و الداني او تجمع عنندك فالدار بعض المستهلكين راك كاتغامر براسك و مستقبلك.
  • 11. أصحاب الجماعة فالمطعم و الساحة و التلامذ فالاقسام مخرجين عروسة و ملي ادخل تعنف فيهم انت لي خاصك العصا و الاعفاء مهمتكم تقابلهم جماعة عطا الله وقتها.
  • 12. صحاب الفورفي و تعياط بالليل و بالنهار حط تلفون من ادك و اديها فولاد الناس راهم امانة لي درتيها معاهم غادي اديروها الاخرين مع ولادك عاجلا او اجلا تهلا لوجه الله تلقى لي اتهلا ليك فولادك واحد نهار.
  • 13. صحاب طباعة جذاذة سنة كاملة مأخوذة من المواقع التربوية من انتم واش لاباس كاضيع فلوسك تخطيط درس مهم ليك أولا باش تفاذى الإرهاق و الارتجالية و ضريب خاوية فعامرة خاصة فالبدايات دير تصور لدرس و اضبط المحتوى عاد دخل القسم.
  • 14. صحاب الأصوات المرتفعة لكايتسمع صوتو من جبل الحديد مالك اخويا مالك اختي والو باس تكايس العاااام طويل و المسيرة طويلة كاتغوت زعما مكلخين مكايفهموش لا اسيدي انت لفيك شي مشكل سير راجع راسك.
  • 15. انت أستاذ و ماشي حارس الفضيلة و الاخلاق الا جاو التلامذ كايعاودو ليك اش طاري جمع و طوي انت مسؤول عما يحدث داخل المدرسة خارحها ماشي شغلك مايحاولوش اقحموك فيها و أحيانا مشاكل تتوارثها الاسر و كايكونو الدراري مجرد ضحايا.
  • 16. الا جا ولي او اب او ام تلميذ اسول على ولدو جابو على قد السؤال بأسلوب بسيط ماديرش فيها واعر وادخل فشي شبوقات ماشي ديالك و مطولش معاه حيث الا فتحتي داك مجال عمرك تسدو.
  • 17. ماتكونش سلبي و كاتبى خطاب المظلوم بمناسبة او بدونها غا كاتشكى كن شجاعا و القى حلول لاي مشكل كيفما كان و ماتشكيش على المدير او المفتش حيث عندهم جواب واحد واخا مايصرحش به هذا سوقو عيان مفيدوش.
  • 18. فاللقاءات التربوية رفع نيفو شوية و حط التلفون و نقص من الجماعة و التكركير لا يعقل مفتش كايقدم عرض او أستاذ كايقدم درس تطبيقي و بنادم ممسوقش مجمع و  كايكرر هادي سميتها قلة احترام.
  • 19. فالاجتماعات و اللقاءات لكاتجمعك بزملاء المهنة الواحد اجمع فمو و عينيه و اضرب حساب للكلمة قبل ما تخرج و الا غادي تسبب ليك فمشاكل انت في غنى عنها.
  • 20. ما تفتحش مواضيع خارج الدرس مع التلامذ خاصة على الأساتذة السابقين ماشي شغلك فلي داز و الا درتيها  نينك ناقصة
  • 21. تفاذى أي نوع من الطلبات على ولاد الناس راهم في امس الحاجة واخة لداك البيض لكايجيب ليك متولفش ليهم اجيبو ليك راك موظف.
  • 22. ما يبقاش الواحد طالق فمو فوسائل النقل العمومية و كايظل اشكي حنا ممخلصين حنا متعاقدين تلامذ ككلخين خرجتي سديتي القسم و راجغ لدراكم نسى داكشي و كاينين شي حرايفية كايقلبو اجبذو منك الهضرة بأية وسيلة جابو بدبلوماسية و سد الموضوع مايصحاب ليك باغي ليك الخير.
  • 23. الاستاذات لكايعطو للخطافة يستحسن ديري رقم مايكونش شخصي باش مايتفرقش فالهضاب و السهول رقم اتصلي به  قضي غراضك و سديه حتى تحتاجيه.
  • 24. هاد المهنة ختاريتها عن قناعة او تفرضات عليك لظروف معينة حاول طور راسك فيها قرا و اجتهدت راك دخلتي بزاد معرفي محدود مع توالي السنوات كاينقص لذلك الواحد اقرا مرة مرة.

و هادشي الا قلناه باش دوز العام بأقل الاضرار و ترجع لراسك و لاهلك بكامل قواك العقلية و الجسدية.

الاسمبريد إلكترونيرسالة